சென்னை: பணத்தை பெற்று கொண்டு காசோலைகள் கொடுத்து மருந்து விற்பனை நிறுவனத்தில் 27.76 லட்சம் கையாடல் செய்த ஊழியர் மற்றும் மருந்து கடை உரிமையாளரை போலீசார் கைது செய்தனர். சென்னை எம்ஜிஆர் நகர் பகுதியில் அசோக் எண்டர்பிரைசஸ்  என்ற மருந்து மொத்த விற்பனை நிறுவனம் இயங்கி வருகிறது. இந்த நிறுவனத்தின் மோலாளர் சதீஷ் (32), இரண்டு நாட்களுக்கு முன் எம்ஜிஆர் நகர் காவல் நிலையத்தில் புகார் ஒன்று அளித்தார். அதில், எங்கள் நிறுவனத்தில் விற்பனை பிரதிநிதியாக ரங்கநாதன் வேலை செய்து வருகிறார். இவர் மருந்து விற்பனை செய்யப்பட்ட வாடிக்கையாளர்களிடம் வசூல் செய்யும் பணத்தில் சிறுக சிறுக கடந்த மூன்று ஆண்டுகளில் 27.76 லட்சம் பணத்தை கையாடல் செய்தது தெரியவந்தது. எனவே, அவர் மீது உரிய நடவடிக்கை எடுக்க வேண்டும் என்று கூறியிருந்தார்.

புகாரின்பேரில் எம்ஜிஆர் நகர் இன்ஸ்பெக்டர் தேவராஜன் வழக்குப்பதிவு செய்து விசாரணை நடத்தினார். அப்போது கே.கே.நகர் கிழக்கு பகுதியை சேர்ந்த ரங்கநாதன் (48), விற்பனை செய்யப்படும் மருந்துக்கான பணத்தை வாடிக்கையாளர்களிடம் பெற்று கொண்டு, குன்றத்தூர் சந்தோஷ் அவென்யூ பகுதியில் மருந்துக்கடை நடத்தி வரும் சிவசங்கரன் (25) உதவியுடன் மருந்து கடைக்காரர்கள் பணத்திற்கு பதில் காசோலை கொடுத்தாக மருந்து நிறுவனத்தில் ரங்கநாதன் கொடுத்து வந்துள்ளார். நிறுவனம் சார்பில் வங்கியில் காசோலை செலுத்திய போது பணம் இல்லாமல் காசோலைகள் திரும்ப வந்துள்ளது. முதலில் இதை மருந்து நிறுவனம் சரியாக கவனிக்கவில்லை. இதை ரங்கநாதன் தனக்கு சாதகமாக பயன்படுத்தி கொண்டார். மருந்து விற்பனைக்கான பணத்தை வாடிக்கையாளர்களிடம் பெற்று கொண்டு அதிகளவில் காசோலைகள் கொடுத்து வந்துள்ளார். ஒரு கட்டத்தில் வாடிக்கையாளர்கள் கொடுத்த காசோலைகள் அனைத்தும் ஒரே வங்கி கணக்கின் காசோலையாக இருந்தது கண்டுபிடிக்கப்பட்டது. அந்த வகையில் கடந்த மூன்று ஆண்டுகளில் ரங்கநாதன் தனது நண்பர் சிவசங்கரன் உதவியுடன் 27.76 லட்சம் மோசடி செய்தது தெரியவந்தது. இதையடுத்து மருந்து நிறுவனத்தின் விற்பனை பிரதிநிதி ரங்கநாதன் மற்றும் மோசடிக்கு உடந்தையாக இருந்த மருந்து கடை உரிமையாளர் சிவசங்கரனை போலீசார் நேற்று கைது செய்தனர்.