சென்னை: கல்லூரி ஆசிரியர்களின் பல்வேறு கோரிக்கைகளை உடனே நிறைவேற்றக்கோரி கல்லூரி ஆசிரியர்கள் டிபிஐ வளாகத்தில் நேற்று முற்றுகைப் போராட்டம் நடத்தினர். அரசுக் கல்லூரிகளில் பணியாற்றும் ஆசிரியர்கள் பல்வேறு கோரிக்கைகள் குறித்து கடந்த 5 ஆண்டுகளாக போராட்டம் நடத்தி வருகின்றனர். அவர்களின் கோரிக்கையை நிறைவேற்ற கால அவகாசம் கேட்ட அரசு அதன் மீது நடவடிக்கை எடுக்கவில்லை. இதையடுத்து, பல்கலைக் கழக ஆசிரியர்கள் சங்கத்தின் சார்பில் நூற்றுக்கும் மேற்பட்ட ஆசிரியர்கள் நுங்கம்பாக்கம் கல்லூரி சாலையில் உள்ள டிபிஐ வளாகத்துக்கு வந்தனர். அங்குள்ள கல்லூரிக் கல்வி இயக்குநர் அலுவலகத்தை முற்றுகையிட்டு கோஷம் போட்டனர். இதையடுத்து, நுங்கம்பாக்கம் போலீசார் அங்கு வந்து ஆசிரியர்களை டிபிஐ வளாகத்துக்குள் செல்ல விடாமல் தடுத்தனர். இதனால் அங்கு சிறிது நேரம் பரபரப்பு ஏற்பட்டது. பின்னர் போலீசார் நடத்திய பேச்சுவார்த்தைக்கு பிறகு சில ஆசிரியர்கள் மட்டும் கல்லூரிக் கல்வி இயக்குநரை சந்தித்து மனு கொடுத்தனர். இது குறித்து பல்கலைக் கழக ஆசிரியர்கள் சங்கத்தின் மாநில தலைவர் காந்திராஜ் கூறியதாவது: ஓய்வு பெறும் வயதை 58க்கு மேல் உயர்த்தக்கூடாது என்பது உள்ளிட்ட 28 கோரிக்கைகள் கொடுத்துள்ளோம். இதன் மீது அரசு உடனடியாக நடவடிக்கை எடுக்க வேண்டும்.  இவ்வாறு தெரிவித்தார்.