தாம்பரம்: தாம்பரத்தை சேர்ந்த விமானப்படை பைலட் அசாம் விமான விபத்தில் பலியானார்.சென்னை அடுத்த கிழக்கு தாம்பரம், பஜனை கோயில் தெருவைச் சேர்ந்தவர் ஜெயபால் (72), ஓய்வு பெற்ற விமானப்படை அதிகாரி.  இவரது மகன் ஜெயபால் ஜேம்ஸ் (47). 1994ல் இந்திய விமானப்படையில் சேர்ந்தார். விமானப்படையில் விங் கமாண்டராக வேலை பார்த்து வந்தார்.இவருக்கு கிரேஸ் அனிதா (45) என்ற மனைவியும், ரோஷன் (20) என்ற மகனும், ரேஷ்மி (18) என்ற மகளும் உள்ளனர். இவர்கள், பெங்களூருவில் வசித்து வருகின்றனர்.  
ஜெயபால் ஜேம்ஸ் அசாம் மாநிலத்தில் உள்ள மஜூலி ஆற்றுப்படுகை பகுதியில் இருவர் மட்டுமே செல்லும் எஸ்.டபிள்யூ 80 மைக்ரோ லைட் விமானத்தில் நேற்று மதியம் சென்ற போது விமானம் விபத்தில் சிக்கியது.   இதில், ஜெயபால் ஜேம்ஸ் மற்றும் அவருடன் சென்ற மற்றொரு விங் கமாண்டர் டி.வாட்ஸ் ஆகியோர் சம்பவ இடத்திலேயே இறந்தனர். பிரம்மபுத்திரா ஆற்றின் பகுதியில் மனிதர்கள் வசிக்காத டர்பார் சோப்ரி பகுதியில் இந்த விபத்து நடந்துள்ளது. அந்த பகுதியில் அசாம் மாநிலம் ஜோர்காட் விமானப்படை தளத்தில் இருந்த விமானப்படையினர் மீட்பு நடவடிக்கையில் ஈடுபட்டனர்.

அசாம் மாநில அதிகாரிகள் படகு மூலம் சென்று மீட்பு நடவடிக்கையில் ஈடுபட்டனர். விமான விபத்தில் ஜெயபால் ஜேம்ஸ் பலியான தகவல் கிழக்கு தாம்பரத்தில் உள்ள அவரது தந்தை ஜெயபாலுக்கு தெரிவிக்கப்பட்டது. கிழக்கு தாம்பரம் பகுதியை சேர்ந்த ஏராளமான பொதுமக்கள் ஜெயபாலை சந்தித்து ஆறுதல் கூறினர்.