Dinamalar

வாஷிங்டன் : அமெரிக்காவில், இந்திய வம்சாவளி மாணவர்கள் அதிகம் படிக்கும் பள்ளியில், முன்னாள் மாணவன் நடத்திய துப்பாக்கிச் சூட்டில், 17 பேர் பலியாயினர்; பலர் படுகாயம் அடைந்தனர். துப்பாக்கிச் சூடு நடத்திய முன்னாள் மாணவனை, போலீசார் கைது செய்துள்ளனர். அவன் பயன்படுத்திய துப்பாக்கியை பறிமுதல் செய்துள்ள போலீசார், அவனிடம் தொடர்ந்து விசாரித்து வருகின்றனர்.

அமெரிக்காவின் புளோரிடா மாகாணத்தில், உள்ள, மார்ஜரி ஸ்டோன்மென் உயர்நிலைப் பள்ளியில், அமெரிக்க மற்றும் இந்திய வம்சாவளி மாணவர்கள் படிக்கின்றனர். இந்த பள்ளியில் படித்த, நிகோலஸ் குரூஸ், 19, ஒழுங்கீன நடவடிக்கையால், கடந்த ஆண்டு பள்ளியிலிருந்து நீக்கப்பட்டான்.

நேற்று முன்தினம், பள்ளி வளாகத்திற்கு துப்பாக்கியுடன் வந்த குரூஸ், திடீரென அங்கிருந்தவர்களை நோக்கி சரமாரியாக சுட்டான். இதனால் அதிர்ச்சி அடைந்த பலர், பள்ளியை விட்டு வேகமாக வெளியேறினர்.
அப்போது, அவர்களை நோக்கியும், குரூஸ் தாக்குதல் நடத்தினான். பள்ளி வகுப்பறை, வாயிற்பகுதி, சாலை என பல இடங்களிலும், குரூசின் துப்பாக்கி குண்டுகள் பாய்ந்தன.

இந்த கண்மூடித்தனமான தாக்குதலில், மாணவர்கள் உட்பட, 17 பேர் பலியாயினர்; பலர் படுகாயம் அடைந்தனர். துப்பாக்கி சத்தம் கேட்டு, அப்பகுதியில், ரோந்துப் பணியில் ஈடுபட்ட போலீசார், விரைந்து வந்து, குரூசை கைது செய்தனர்.

அவனிடம் இருந்த, துப்பாக்கியையும் பறிமுதல் செய்தனர். கடும் மன உளைச்சலுடனும், கோபத்துடனும் காணப்பட்ட குரூசிடம், தாக்குதலுக்கான காரணம் குறித்து, போலீசார் விசாரித்து வருகின்றனர். இந்த தாக்குத லுக்கு, அமெரிக்க அதிபர் டிரம்ப், கடும் கண்டனம் தெரிவித்துள்ளார்.

உலகின் வேறெந்த வளர்ந்த நாடுகளிலும் இல்லாத வகையில், அமெரிக்காவில், துப்பாக்கி கலாசாரம் தலை துாக்கியுள்ளதாக, அந்நாட்டு எம்.பி.,க்கள் வேதனை தெரிவித்துள்ளனர். 'இந்த சம்பவம் குறித்து, விரிவான விசாரணை நடத்தப்படும்' என, புளோரிடா மாகாண கவர்னர் உறுதி அளித்துள்ளார்.