சென்னை: 1.12 கோடி மோசடி புகாரில் முகாந்திரம் இருந்தால் ஜெ.தீபா மீது வழக்கு பதிவு செய்ய வேண்டும் என்று போலீசுக்கு சென்னை உயர் நீதிமன்றம் உத்தரவிட்டுள்ளது. சென்னை ஈஞ்சம்பாக்கத்தை சேர்ந்த முட்டை வியாபாரியான ராமச்சந்திரன், உயர் நீதிமன்றத்தில் தாக்கல் செய்துள்ள மனுவில் கூறியிருப்பதாவது:  முன்னாள் முதல்வர் ஜெயலலிதா இறந்த பிறகு ஜெயலலிதாவின் அண்ணன் மகள் தீபா,  எம்.ஜி.ஆர். அம்மா தீபா பேரவையை தொடங்கினார். இந்த பேரவையில் காஞ்சிபுரம் மாவட்ட செயலாளராக பதவி வகித்து வந்தேன். பேரவை செலவுகளுக்காகவும், கட்சி அலுவலக புனரமைப்பு செலவுகளுக்காகவும், ஜெ.தீபாவின் குடும்ப செலவுகளுக்காகவும் பணம் வேண்டுமென தீபா மற்றும் அவரது உதவியாளர் ஏ.வி.ராஜா ஆகியோர் கடந்த ஆண்டு பிப்ரவரி மாதம் முதல் பல்வேறு கட்டங்களாக 1 கோடியே 12 லட்சம் வரை என்னிடம் வாங்கினார்கள்.  பணத்தை திரும்ப கேட்டபோதுஇருவரும் கொலை மிரட்டலும் விடுத்தனர். இதுகுறித்து வழக்கு பதிவு செய்து உரிய விசாரணை நடத்துமாறு போலீசுக்கு உத்தரவிட வேண்டும்.இவ்வாறு மனுவில் கூறப்பட்டுள்ளது. இந்த மனு நீதிபதி எம்.எஸ்.ரமேஷ் முன்னிலையில் நேற்று விசாரணைக்கு வந்தது. மனுவை விசாரித்த நீதிபதி, மனுதாரர் கொடுத்த புகார் மீது விசாரணை நடத்தி புகாரில் முகாந்திரம் இருந்தால் வழக்கு பதிவு செய்ய வேண்டும் என்று போலீசுக்கு உத்தரவிட்டார்.