திருச்சி: ஹெல்மெட்  சோதனை நடத்திய சிறப்பு எஸ்ஐயின் வாக்கி டாக்கி திருடு போனது.திருச்சி தில்லை நகர் போலீஸ் நிலையத்தில் சிறப்பு எஸ்ஐயாக  இருப்பவர் பழனிசாமி. இவர் கடந்த 1ம் தேதி கே.டி ஜங்ஷன் அருகே ஹெல்மெட் போடாமல் வந்த இருசக்கர வாகன ஓட்டிகளை பிடித்து அபராத தொகை வசூலித்தார். அப்போது அவரிடமிருந்த வாக்கிடாக்கியை போலீஸ் வாகனத்தின் பேனட் மீது வைத்திருந்தார். தொடர்ந்து வேறு இடத்தில் நின்று வாகனங்களை மடக்கி பிடிக்க புறப்பட்டு சென்றார். அப்போது வாகனத்தின் மீது வைத்த வாக்கிடாக்கியை எடுத்து செல்ல மறந்து சென்று விட்டார்.

அதன்பின் சுமார் 1 மணிநேரம் கழித்து வாக்கிடாக்கியை காணாதது குறித்து திடுக்கிட்டு தேடி சென்றார். ஆனால் எங்கு தேடியும் கிடைக்கவில்லை. வாகன ஓட்டிகள் யாராவது, வாக்கிடாக்கியை எடுத்து சென்றார்களா என்பது குறித்து போலீசார் வழக்கு பதிந்து விசாரணை நடத்தி வருகிறார்கள். மேலும் பணியில் அசட்டையாக இருந்ததற்காக சிறப்பு எஸ்ஐ பழனிசாமிக்கு மெமோ வழங்கப்பட்டது.