ਸੱਕੀ ਨਾਲੇ `ਤੇ ਬਣੇ ਖਸਤਾ ਹਾਲਤ ਪੁੱਲ ਲਈ ਵੀ ਗ੍ਰਾਂਟ ਦੇਣ ਦਾ ਐਲਾਨ
ਅੰਮ੍ਰਿਤਸਰ, 11 ਫਰਵਰੀ (ਪੰਜਾਬ ਪੋਸਟ ਬਿਊਰੋ) – ਪਿਛਲੇ ਦਿਨੀ ਅਖਬਾਰੀ ਸੁਰਖੀਆਂ ਦਾ ਸ਼ਿੰਗਾਰ ਬਣੇ ਸਰਹੱਦੀ ਖੇਤਰ ਦੇ ਪਿੰਡ ਚੱਕ 
ਔਲ ਦੇ ਸਰਕਾਰੀ ਮਿਡਲ ਸਕੂਲ ਦੇ ਖੁੱਲੇ ਅਸਮਾਨ ਹੇਠ ਪੜਦੇ ਵਿਦਿਆਰਥੀਆਂ ਨੂੰ ਸਕੂਲ ਵਿੱਚ ਛੱਤ ਮੁਹੱਈਆ ਕਰਵਾਉਣ ਲਈ ਅੰਮ੍ਰਿਤਸਰ ਤੋਂ ਨੌਜੁਆਨ ਕਾਂਗਰਸੀ ਮੈਂਬਰ ਪਾਰਲੀਮੈਂਟ ਗੁਰਜੀਤ ਸਿੰਘ ਔਜਲਾ ਨੇ ਮਦਦ ਭਰੇ ਹੱਥ ਵਧਾਉਂਦਿਆਂ ਐਮ.ਪੀ ਕੋਟੇ ਵਿਚੋਂ 15 ਲੱਖ ਰੁਪਏ ਦੇਣ ਦਾ ਐਲਾਨ ਕੀਤਾ ਹੈ।
ਪਿਛਲੇ ਦਿਨੀ ਮੀਡੀਆ ਵਿੱਚ ਆਈ ਖਬਰ ਨੂੰ ਪੜ੍ਹਕੇ ਔਜਲਾ ਅੱਜ ਸਰਕਾਰੀ ਮਿਡਲ ਸਕੂਲ ਚੱਕ ਔਲ ਵਿਖੇ ਵਿਸੇਸ਼ ਤੌਰ `ਤੇ ਪੁੱਜੇ ਅਤੇ ਬਿਲਡਿੰਗ ਵਿਹੂਣੇ ਸਕੂਲ ਨੂੰ ਦੇਖਦਿਆਂ ਮੌਕੇ ਤੇ ਹੀ ਜਿਥੇ ਸਕੂਲ ਦੀ ਬਿਲਡਿੰਗ ਲਈ 15 ਲੱਖ ਰੁਪਏ ਦੇਣ ਦਾ ਐਲਾਣ ਕੀਤਾ।ਉਥੇ ਹੀ ਪਿੰਡ ਚੱਕ ਔਲ ਦੇ ਨਜ਼ਦੀਕ ਵੱਗਦੇ ਸੱਕੀ ਨਾਲੇ `ਤੇ ਬਣੇ ਲੋਹੇ ਦੇ ਪੁੱਲ ਦੀ ਥਾਂ `ਤੇ ਪੱਕਾ ਅਤੇ ਖੁੱਲਾ ਪੁਲ ਬਣਾ ਕੇ ਦੇਣ ਦਾ ਐਲਾਨ ਵੀ ਕੀਤਾ।ਔਜਲਾ ਨੂੰ ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਸੱਕੀ ਨਾਲੇ `ਤੇ ਬਣੇ ਖਸਤਾ ਹਾਲਤ ਲੋਹੇ ਦੇ ਪੁੱਲ `ਤੇ ਪਹਿਲਾਂ ਵੀ ਕਈ ਹਾਦਸੇ ਵਾਪਰ ਚੁੱਕੇ ਹਨ ਅਤੇ ਇਸ ਪੁੱਲ ਤੋਂ ਸਿਰਫ ਖਾਲੀ ਟਰੈਕਟਰ ਟਰਾਲੀ ਹੀ ਲੰਘ ਸਕਦੀ ਹੈ ਜਦਕਿ ਫਸਲ ਨਾਲ ਭਰੀ ਟਰਾਲੀ ਨੂੰ 5 ਤੋਂ 10 ਕਿਲੋਮੀਟਰ ਦੂਰ ਦੇ ਰਸਤੇ ਰਾਹੀਂ ਪਿੰਡ ਲਿਜਾਇਆ ਜਾ ਸਕਦਾ ਹੈ।ਔਜਲਾ ਨੇ ਪਿੰਡ ਚੱਕ ਔਲ ਤੋਂ ਅਜਨਾਲਾ ਨੂੰ ਜੋੜਨ ਵਾਲੀ ਖਸਤਾ ਹਾਲਤ ਸੜਕ ਨੂੰ ਵੀ ਪ੍ਰਧਾਨ ਮੰਤਰੀ ਗ੍ਰਾਮ ਸੜਕ ਯੋਜਨਾ ਤਹਿਤ ਬਣਾਉਣ ਦਾ ਐਲਾਨ ਕੀਤਾ।ਔਜਲਾ ਨੇ ਦੱਸਿਆ ਕਿ ਚੱਕ ਔਲ-ਕਮੀਰਪੁਰਾ ਨਜ਼ਦੀਕ ਸਥਾਈ ਪੁੱਲ ਬਨਣ ਨਾਲ ਜਿਥੇ ਕਿਸਾਨਾਂ ਨੂੰ ਆਪਣੀ ਫਸਲ ਸਾਂਭਣ ਵਿੱਚ ਸਹੂਲਤ ਮਿਲੇਗੀ, ਉਥੇ ਹੀ ਚੱਕ ਔਲ ਤੋਂ ਅਜਨਾਲਾ ਤੱਕ ਅੰਤਰਰਾਸ਼ਟਰੀ ਮਿਆਰ ਦੀ ਸੜਕ ਬਨਣ ਨਾਲ ਸਰਹੱਦੀ ਖੇਤਰ ਦੇ ਲੋਕਾਂ ਦੀ ਅਜਨਾਲਾ-ਅੰਮ੍ਰਿਤਸਰ ਤੱਕ ਪਹੁੰਚ ਸੁਖਾਲੀ ਹੋ ਜਾਵੇਗੀ।ਇਸ ਮੌਕੇ ਔਜਲਾ ਨਾਲ ਕਾਂਗਸਰੀ ਆਗੂ ਸੋਨੂੰ ਜਾਫਰ, ਸਮਸ਼ੇਰ ਸਿੰਘ, ਹਰਜੀਤ ਸਿੰਘ ਸਾ: ਸਰਪੰਚ, ਸੁਖਦੇਵ ਸਿੰਘ, ਜਗਜੀਤ ਸਿੰਘ, ਜਗਦੀਸ਼ ਮਸੀਹ, ਜਸਕਰਨ ਸਿੰਘ, ਅਵਤਾਰ ਸਿੰਘ, ਤਰਸੇਮ ਸਿੰਘ ਆਦਿ ਹਾਜਰ ਸਨ।