Dinamalar

ராஜாஜி, காமராஜர், முத்துராமலிங்க தேவர், அம்பேத்கர் வரிசையில் முதல்வராக இருந்த மறைந்த ஜெயலலிதாவுக்கு மரியாதை செலுத்தும் வகையில், தமிழக சட்டசபையில் அவரது உருவப்படத்தை தமிழக அரசு இன்று ( 12 ம் தேதி) திறந்தது. இதற்கு தி.மு.க.,-பா.ம.க.,-தே.மு.தி.க.,-கம்யூனிஸ்டுகள் உள்ளிட்ட எதிர்க்கட்சிகள் கடும் எதிர்ப்பு தெரிவித்துள்ளன. பா.ஜ., மட்டும் ஆதரவு கொடுப்பதால் அரசியலில் கலகலப்பு ஏற்பட்டுள்ளது.

ஜெயலலிதா பிறந்த நாள் விழா வரும் 24ல் அ.தி.மு.க.,வினரால் கோலாகலமாக கொண்டாடப்பட உள்ளது. இதையொட்டி, கட்சி அலுவலகத்தில் அவரது உருவச்சிலை திறக்கப்படுகிறது. அதே நாளில் சட்டசபையில் ஜெ., உருவப்படத்தை பிரதமர் மோடி திறந்து வைக்க அ.தி.மு.க., தலைமை விரும்பியது. ஆனால், பிரதமர் தரப்பில் இருந்து இதற்கு ஒப்புதல் கிடைக்கவில்லை.இந்நிலையில், தினகரன் அணியை சேர்ந்த 18 எம்.எல்.ஏ.,க்களின் தகுதி நீக்கத்தை எதிர்த்தவழக்கில் விரைவில் தீர்ப்பு வெளியாக உள்ளது.

தீர்ப்பின் முடிவு ஆளுங்கட்சிக்கு பாதகமானால் முதல்வர் பழனிசாமி தலைமையிலான ஆட்சிக்குசிக்கல் ஏற்படும்.அதேபோல, அரசு அலுவலகங்களில் ஜெ., உருவப்படம் வைக்க எதிர்ப்பு தெரிவித்து சென்னை உயர்நீதிமன்றத்தில் தி.மு.க., தொடுத்துள்ள வழக்கும் இன்று விசாரணைக்கு வர உள்ளது. இந்த சிக்கலான சூழலில், தமிழக அரசு இன்று ஜெ., உருவப்படம் திறக்கும் நடவடிக்கையை எடுத்துள்ளது.

தமிழக சட்டசபையில் முன்னாள் முதல்வர்கள், ராஜாஜி, காமராஜர், அண்ணாதுரை, எம்.ஜி.ஆர்., மற்றும்

முத்துராமலிங்க தேவர், சட்ட மேதை அம்பேத்கர் ஆகியோருக்கு மரியாதை செலுத்தும் வகையில் அவர்களின் உருவப்படங்கள் வைக்கப்பட்டு உள்ளன. அந்த வரிசையில் முதல்வராக இருந்து மறைந்த ஜெ.,க்கு மரியாதை அளிக்கும் வகையில் அவரது உருவப்படம் சட்டசபையில் இன்று காலை 9:30 திறந்து வைக்கப்பட்டது.

முதல்வர் பழனிசாமி, துணை முதல்வர் பன்னீர்செல்வம் ஆகியோர் தலைமையில், சபாநாயகர் தனபால், ஜெ., உருவப்படத்தை திறந்து வைத்தார்.

போர்க்கொடி

அதேநேரத்தில், சட்டசபையில் ஜெ.,உருவப்படம் திறப்புக்கு, தி.மு.க., - பா.ம.க., - தே.மு.தி.க., - கம்யூ., உள்ளிட்ட எதிர்க்கட்சிகள் கடும் எதிர்ப்பு தெரிவித்துள்ளன.இது குறித்து தி.மு.க., செயல்தலைவர் ஸ்டாலின் கூறியதாவது:உச்ச நீதிமன்றத்தால் குற்றவாளி என தீர்ப்பு வழங்கப்பட்ட ஜெ.,யின் உருவப்படத்தை சட்டசபையில் திறப்பது, சட்டவிதிகளுக்கு முரணானது; இது ஒரு கருப்பு நடவடிக்கை.

உச்ச நீதிமன்ற நீதிபதிகள் ஜெ.,வையும் சேர்த்து நான்குபேர் குற்றவாளிகள் என, தெளிவாக தீர்ப்பு அளித்துள்ளனர். முதல் குற்றவாளியான ஜெ., இறந்து விட்டதால் சிறைக்கு செல்லவில்லையே தவிர குற்றவாளி என்பதில் மாற்றமில்லை. எனவே திறப்பு விழாவில், தி.மு.க., பங்கேற்காது. இவ்வாறு அவர் கூறினார்.

தி.மு.க., முதன்மை செயலர் துரைமுருகன் கூறுகையில், ''பிரதமர் மோடியை அழைத்து, ஜெ., உருவப்படத்தை திறக்க முதல்வர் பழனிசாமி அரசு, பல மாதங்களாக முயற்சி செய்தது; மோடி அதை ஏற்கவில்லை. இதனால், அவசர அவசரமாக திடீரென படத்திறப்பு விழாவை நடத்துகின்றனர்,'' என்றார்.