புதிய மாருதி ஸ்விப்ட் கார் அறிமுகம்

பெரும் எதிர்பார்ப்புக்கு மத்தியில் புதிய மாருதி ஸ்விப்ட் கார், கிரேட்டர் நொய்டாவில் நடந்து வரும் சர்வதேச ஆட்டோ எக்ஸ்போவில் விற்பனைக்கு அறிமுகம் செய்யப்பட்டது. இப்புதிய மாருதி ஸ்விப்ட் கார் பெட்ரோல், டீசல் மாடல்களில் தலா 6 வேரியண்ட்டுகள் வீதம் மொத்தம் 12 வேரியண்ட்டுகளில் கிடைக்கிறது. பெட்ரோல் மாடல் LXi, VXi, VXi AMT, ZXi, ZXi AMT மற்றும் ZXi+ ஆகிய 6 வேரியண்ட்டுகளில், டீசல் மாடல் LDi, VDi, VDi AMT, ZDi,ZDi AMT மற்றும் ZDi+ ஆகிய 6 வேரியண்ட்டுகளில் கிடைக்கிறது. ஏஎம்டி மாடல் மிகவும் விலை உயர்ந்த ZXi+ மற்றும் ZDi+ ஆகிய வேரியண்ட்டுகளில் கிடைக்காது. பழைய மாடலில் இருந்த அதே பெட்ரோல், டீசல் இன்ஜின்கள்தான் இப்புதிய மாருதி ஸ்விப்ட் காரிலும் பயன்படுத்தப்பட்டுள்ளது. இந்த காரின் பெட்ரோல் மாடலில் இருக்கும் 1.2 லிட்டர் இன்ஜின் அதிகபட்சமாக 83 பிஎச்பி பவரையும், 115 என்எம் டார்க் திறனையும் வழங்கும். டீசல் மாடலில் இருக்கும் 1.3 லிட்டர் மல்டிஜெட் டீசல் இன்ஜின் அதிகபட்சமாக 74 பிஎச்பி பவரையும், 190 என்எம் டார்க் திறனையும் வழங்க வல்லது. பெட்ரோல், டீசல் மாடல்களில் புதிய 5 ஸ்பீடு மேனுவல் கியர்பாக்ஸ் அல்லது ஏஎம்டி கியர்பாக்ஸ் ஆப்ஷனில் தேர்வு செய்துகொள்ள முடியும். மேற்குறிப்பிட்டது போல, ஏஎம்டி கியர்பாக்ஸ் சில குறிப்பிட்ட வேரியண்ட்டுகளில் மட்டுமே தேர்வுசெய்ய முடியும். புதிய மாருதி ஸ்விப்ட் காரின் பெட்ரோல் மாடல் லிட்டருக்கு 22 கி.மீ மைலேஜ், டீசல் மாடல் லிட்டருக்கு 28.4 கி.மீ மைலேஜ் வழங்கும் என மாருதி அறிவித்துள்ளது. இப்புதிய மாருதி ஸ்விப்ட் கார், மாருதி சுஸுகி நிறுவனத்தின் ஹார்ட்டெக்ட் என்ற இலகுவான கட்டமைப்பு தாத்பரியத்தில் உருவாக்கப்பட்டு இருக்கிறது. பழைய மாடலைவிட அதிக உறுதியான கட்டமைப்பையும், அதேநேரத்தில் அதிக வலுவானதாகவும் உருவாக்கப்பட்டு இருக்கிறது.

புதிய கட்டமைப்பு தாத்பரியத்தின் மூலமாக, பழைய ஸ்விப்ட் காரைவிட புதிய மாருதி ஸ்விப்ட் கார் 85 கிலோ எடை குறைந்துள்ளது. வேரியண்ட்டுக்கு ஏற்ப, பெட்ரோல் மாடல் 880 கிலோவில் இருந்து 855 கிலோ வரையிலும், டீசல் மாடல் 955 கிலோவில் இருந்து 985 கிலோ வரையிலும் எடை கொண்டுள்ளது. இப்புதிய கார், 3,840 மி.மீ நீளம், 1,735 மி.மீ அகலம், 1,530 மி.மீ உயரம் கொண்டதாக வடிவமைக்கப்பட்டுள்ளது. வீல் பேஸ் 2,450 மி.மீ என்பது குறிப்பிடத்தக்கது. பழைய மாடலைவிட, புதிய மாடல் 40 மி.மீ அகலம், 20 மி.மீ உயரம் கொண்டது. அதேநேரத்தில், நீளம் 10 மி.மீ குறைக்கப்பட்டுள்ளது.  நீளம் குறைக்கப்பட்டு இருந்தாலும், இதன் வீல் பேஸ் அதிகரிக்கப்பட்டு இருப்பதால், மிகச்சிறப்பான உட்புற இடவசதியை பெற்றிருக்கிறது. இந்த காரின் பூட் ரூம் கொள்திறன் 58 லிட்டர் வரை கூடியுள்ளது. தற்போது 265 லிட்டர் கொள்திறன் கொண்ட பூட்ரூமுடன் வந்துள்ளது. இப்புதிய கார், 163 மி.மீ கிரவுண்ட் கிளியரன்ஸ் கொண்டுள்ளது. எல்இடி புரொஜெக்டர் ஹெட்லைட், புதிய க்ரில் அமைப்பு மற்றும் பம்பர் ஆகியவை இப்புதிய காருக்கு புதுப்பொலிவை கொடுத்துள்ளது. பக்கவாட்டில், பழைய மாடலுக்கும், புதிய மாடலுக்கும் பெரிய அளவு வித்தியாசம் இல்லை. பக்கவாட்டில் பெரிய மாற்றமாக சி பில்லர் கருப்பு வண்ணப்பூச்சு கொடுக்கப்பட்டுள்ளது. பின்புற கதவில் கைப்பிடிகள் மறைத்திருப்பது முக்கிய அம்சமாக இருக்கிறது. பின்புறத்தில் புதிய எல்இடி ஹெட்லைட் அமைப்பு கொடுக்கப்பட்டுள்ளது. டெயில் கேட் மற்றும் பம்பர் அமைப்பிலும் மாற்றம் செய்யப்பட்டிருந்தாலும், பழைய மாடலின் தாக்கம் அதிகம் இருப்பதை மறுக்க இயலாது.

இப்புதிய காரில், இன்டீரியரில் அதிகம் மாற்றம் செய்யப்பட்டுள்ளது. தட்டையான அடிப்பாகம் கொண்ட ஸ்டீயரிங் வீல், வட்ட வடிவ ஏசி வென்ட், புதிய இன்போடெயின்மென்ட் சிஸ்டம் போன்றவை இதன் முக்கிய அம்சங்களாக உள்ளது. இக்காரில், 7 அங்குல தொடுதிரை கொண்ட புதிய இன்போடெயின்மென்ட் சிஸ்டம் பொருத்தப்பட்டுள்ளது. ஆப்பிள் கார் ப்ளே மற்றும் ஆன்ட்ராய்டு ஆட்டோ சாப்ட்வேர்களை இந்த இன்போடெயின்மென்ட் சிஸ்டம் சப்போர்ட் செய்யும். இந்த சாதனத்தில் மிரர்லிங்க் வசதியும் உண்டு. கிளைமேட் கன்ட்ரோல் சிஸ்டத்திற்கான கட்டுப்பாட்டு வசதி, வட்ட வடிவிலான டயல்கள் கொடுக்கப்பட்டு இருப்பதும் இதன் முக்கிய சிறப்பம்சமாக இருக்கிறது. ஸ்மார்ட் கீ, ஸ்டார்ட் - ஸ்டாப் வசதி, ஆட்டோ ஹெட்லைட், ஆட்டோமேட்டிக் கிளைமேட் கன்ட்ரோல் சிஸ்டம், ரிமோட் கீலெஸ் என்ட்ரி ஆகியவை இதன் முக்கிய வசதிகளாக உள்ளது. இந்த காரில் முன்வரிசைக்கான இரண்டு ஏர்பேக், இபிடி நுட்பத்துடன்கூடிய ஏபிஎஸ் பிரேக்கிங் சிஸ்டம், குழந்தைகளுக்கான இருக்கை பொருத்துவதற்கான ஐசோபிக்ஸ் ஆங்கர் ஆகியவை முக்கிய பாதுகாப்பு வசதிகளாக இருக்கின்றன.

சிவப்பு, வெள்ளை, சில்வர், சாம்பல், நீலம் மற்றும் ஆரஞ்ச் என 6 விதமான வண்ண தேர்வுகளில் கிடைக்கிறது. கார் வடிவமைப்பு மற்றும் வசதிகளில் முற்றிலும் புதிய மாடலாக மேம்படுத்தப்பட்டு இருப்பதுடன், ஏராளமான தொழில்நுட்ப வசதிகளுடன் வந்துள்ளது. இது, வாடிக்கையாளர்களை பெரிதும் கவரும் வகையில் உள்ளது. பெட்ரோல் மாடல் 4.99 லட்சம் முதல் 7.39 லட்சம் வரையிலான (டெல்லி எக்ஸ்ஷோரூம்) விலையிலும், டீசல் மாடல் 5.99 லட்சம் முதல் 8.29 லட்சம் வரையிலான (டெல்லி எக்ஸ்ஷோரூம்) விலையிலும் கிடைக்கிறது. போட்டியாளர்களைவிட, மிகவும் சவாலான விலையில் விற்பனைக்கு களமிறக்கப்பட்டு இருப்பதால், வழக்கம்போல் வாடிக்கையாளர்களின் ஏகோபித்த ஆதரவை மீண்டும் பெறும் என நம்பலாம்.