Dinamalar

ரமல்லா : பாலஸ்தீனம் சென்றுள்ள பிரதமர் நரேந்திர மோடியிடம், இஸ்ரேலுடனான பிரச்னைக்கு நிரந்தர தீர்வு காண உதவும்படி, அந்த நாட்டு அதிபர் மஹ்மூது அப்பாஸ் கோரிக்கை வைத்தார். இதையடுத்து, ''பேச்சுவார்த்தை மூலம், அமைதியான சூழலில், பாலஸ்தீனம் விரைவில் சுதந்திர நாடாகும்,'' என, பிரதமர் நம்பிக்கை தெரிவித்தார்.

மேற்காசியாவின், பாலஸ்தீனம், ஐக்கிய அரபு எமிரேட்ஸ், ஓமன் ஆகிய நாடுகளுக்கு, மூன்று நாள் பயணமாக, பிரதமர் மோடி, நேற்று முன்தினம், டில்லியிலிருந்து புறப்பட்டுச் சென்றார். பாலஸ்தீனம் செல்லும் வழியில், ஜோர்டான் தலைநகர் அம்மானில் இறங்கினார். அவரை, அந்நாட்டு பிரதமர், ஹனி அல்-முல்கி வரவேற்றார். தொடர்ந்து, ஜோர்டான் மன்னர், இரண்டாம் அப்துல்லாவை சந்தித்து பேசினார்.

5 ஒப்பந்தங்கள்

நேற்று காலை ஜோர்டானிலிருந்து, அந்நாட்டு ராணுவ ஹெலிகாப்டரில், பாலஸ்தீனத்துக்கு பிரதமர் மோடி சென்றார். பாலஸ்தீன தலைநகர் ரமல்லாவில், பிரதமர் மோடியை, அந்நாட்டு பிரதமர், ரமி ஹம்தல்லா வரவேற்றார்.

தொடர்ந்து, ரமல்லாவில் உள்ள அதிபர் மாளிகைக்கு, மோடி சென்றார். அங்கு அவருக்கு சிவப்பு கம்பள வரவேற்பு அளிக்கப்பட்டது. மோடியை, பாலஸ்தீன அதிபர், மஹ்மூது அப்பாஸ் வரவேற்றார். இரு நாட்டு தேசிய கீதங்களும் இசைக்கப்பட்டன.